Neh 9 | ZomZIV | STEP | Tua kha mah a ni sawmnih le lina ni-in Israel-te khempeuh kikhawm uh a, an tangin, ippi puan silhin a lutunguah leivui a kibuak uh hi.

Nehemiah 9

Israel-te in Mawhna Pulaak

1 Tua kha mah a ni sawmnih le lina ni-in Israel-te khempeuh kikhawm uh a, an tangin, ippi puan silhin a lutunguah leivui a kibuak uh hi. 2 Amau omna mun ciatah dingin amaute mawhnate le a pate uh gitlohnate a pulaak uh hi. 3 Amau omna munah ding uh a, TOPA amaute Pasian Thukham Laibu ni khat sehli suah sehkhat sung simin, a sehli suah seh dang khat pen kipulaakna le TOPA amau Pasian biakna hunin a zang uh hi. 4 Kahlei tunga a ding Levi-te Jeshua, Bani, Kadmiel, Shebaniah, Bunni, Sherebiah, Bani le Kenani - hihte in TOPA amaute Pasian, nakpi in a sam uh hi. 5 Tuateh Levi-te - Jeshua, Kadmiel, Bani, Hashabneiah, Sherebiah, Hodiah, Shebaniah le Pethahiah - hihte in, “Ding unla tawntung pana tawntungpa ^{▼▼9.5 Ahikeh a tawntung a pasian ahi denpa}TOPA note Pasian phat un:

“A minthang nangma min thupha kipia henla thupha khempeuh le phatna khempeuh tungah kitawisang ta hen. 6 Nang bek TOPA na hi hi. Nang in vante, a sangpen vante nangawn le aksi honpite, leitung le a tunga om khempeuh, tuipi le a sunga om khempeuh, na bawl hi. Na khempeuh na nungtasak a, vanmi honpite in nang hong bia uh hi.
7 “TOPA nangmah Pasian na hi a, Abram telin Chaldean-a Ur panin na paikhiatpih a, Abraham min phuakpa na hi hi. 8 A lungsim nang tungah a muanhuai lam na mu a, ama suante tungah Canaan-te, Hit-te, Amor-te Perez-te, le Girgash-te gam piak dingin amah tawh thukhun na bawl hi. Nang a thumaan na hi manin na thuciam na tungsak hi. ^b
9 “Egypt a ka pute uh thuakna na mu hi. Tuipi San ^{▼▼9.9 Hebrew ah Yam Suph; tua pen Pumpeng Tuipi} ah amaute kikona na za hi. 10 Egypt-te in amaute a bawlsiat zia uh ciantakin thei na hi manin Pharaoh tung, a uliante le a gam mite khempeuh tungah a piandang le a lamdang limte na bawl hi. Tuni donga om lai min khat nang le nang na phuah hi. 11 Amaute mai-ah tuipi na khenkham a, leikeu tawnin na kantansak hi; ahi hangin amau a delhte tuithuk sungah na lawna, tuihat sunga suangthum lot na bangsak hi. 12 Sunin meiikhuamin na makaih a, zanin a pai nading uh lampi-ah khuavak dingin meikhuam tawh na makaih hi. ^d
13 “Sinai Vum tungah nong kumsuk a, van panin amaute na hopih hi. Amaute a thumaan a thutang ngeinate le thukhamte le a hoih thukipte le thupiakte na pia hi. 14 Amaute tungah na Sabbath siangtho na theisak-a amaute thupiakna, thukhensatna le thukhamte Moses tungtawnin na pia hi. 15 A gil uh a kial leh van panin anlum na pia-a a dang uh a tak leh suangpi panin tui na puak hi; khut vikto in amaute piak dinga na ciamsa leitang ah pai-in a neih nadingun na gen hi. ^e
16 “Ahi hangin ka pute uh kiphasak lua-in genhak uh a, na thupiakte a mang kei uh hi. 17 Na thu mang nuam lo uh a, amaute laka na bawl nalamdangte a phawk nuam kei uh hi. Amaute genhak uh a, a salsuahna-uah a paikik nadingun a lehdo ding makai a seh uh hi. Ahi hangin nang, mawhna a maisak a hehpihthei, le mi a khuatuah, a heh hak, itna dim a nei Pasian na hi hi. Tua ahi manin 18 amaute mahmah in bawngno lim sungin, ‘Hih in Egypt pana hong pikhia note Pasian ahi hi,’ a cih ciang nangawn uh ahikeh a kihtakhuai gendaina a bawl uh hangin na nusia tuan kei hi.
19 “Na khuatuahna lianpi hangin amaute sehnel gamah na nusia kei hi. Meii khuampi in sunin amaute lamlak den-a, zan in zong mei-khuampi amau lampi ah a tang hi. 20 Amaute ahoih nangma Kha lam na laksak hi. Amaute kamah manna na kitalawisak kei-a a dangtak uh ciangin tui na pia hi. 21 Kum sawmli sung sehnel gamah na vaak hi; amaute bangmah kisam loin a puan uh zong paat lo-a, a khe nangawn uh zong a bawk kei hi. ^f
22 “Amaute kumpi-gam le minamte na pia a, gammong gamla pen nangawn na piakhia hi. Amaute in Heshbon kumpipa gam, Sihon ^{▼▼9.22 Hebrew khutgelh khat le Septuagint; Hebrew khutgelh tampen ah Sihon gam sung le} le Bashan kumpipa Og gam a la uh hi. 23 Nangmah in a tate uh vana aksi zaha tam dingin na bawl-a, pai-a a luah dingun a pate uh tunga na gensa gamah na puak hi. 24 A tapate uh lutin tua gam a nei uh hi. Tua gama teng Canaan mite amaute mai-ah na guallelsaka; amau khutah Canaan mite pia in, a ut bangbangun a bawl dingun a kumpipa, a mite le a gam uh na piakhawm hi. 25 Amaute in kulha ki-umsa khuapite le lei hoihna munte la uh a; na hoih khempeuh a kicing inn, tuikhuk tawhsa, lenggui lo, olive lo le singgah kung tampitak a nei uh hi. Amaute in tuate a duh bangbangun ne-in kivak uh a, a lian mahmah nangma hoihna nuam a sa uh hi. ^h
26 “Ahi hangin amaute thumang loin nang hong lehdo uh a; na thukham a nungngatsan uh hi. Amaute nang lama a kihei nadingun a zol, na kamsangte that uh a; a lauhuai mindaisakna a bawl uh hi. 27 Tua ciangin a nenniam amau galte khutah na pia hi. Ahi hangin amaute a kinetniam ciangin nang tungah hong kiko uh hi. Amaute hong kohna van panin na za-a, na khuatuahna lianpi hangin a galte uh khut panin a hukhia ding na pia hi. ⁱ
28 “Ahi hangin a tawl uh a dam ciangin nang muhna ah a hoih lo a sem kik zel uh hi. Tua ciangin a galte uh khut sungah amaute na pia-a a galte un amaute a uk hi. Nang tungah hong kiko leuleu uh ciangin van panin na za-a na khuatuahna-in amaute tam veipi na hukhia hi. ^j
29 “Na thukham lama a kihei nadingun na vauhilh hangin kiphasak lua uh a, na thupiak a mang kei uh hi. Mi khat in a zuih leh a nungtasak thei na ngeinakipte tungah a mawh uh hi. Phengphi in nang hong nungngatsan uh a, ngawngkhauhin na thu a ngai kei uh hi. 30 Kum tampi tak amaute na thuak keiikai hi. Kamsangte tungtawnin na Kha-in na vauhilh hi. Amaute in thusim lo teitei uh a, tua ciangin amau gamveng mite khutah na pia hi. 31 Ahi hangin a hehpih thei, mi a lainat Pasian na hi manin na lainat luat manin amaute beisak tuan loin na nusia kei hi. ^k
32 “Tua ahi ciangin kote Pasian, a lian mahmah a thahat a kihtakhuai, itna thukhun a palsat lo Pasian aw, Assyria kumpipa huna kipan tuni dong kote tung, ka kumpite uh le ka makaite uh tung, ka siampite uh le kamsangte tung, ka pate uh le na mite khempeuh tunga hong tung hih haksatnate hong neu muhsak kei in. 33 Ko tunga hong tungsa khempeuh ah nang na thutang khin a, mawhna ka bawl lai-un muanhuaitakin na sem hi. 34 Ka kumpite uh, ka makaite uh, ka siampite uh le ka pate un na thukham zui lo uh a; na thupiakte le amau na vauhilhnate a thusim kei uh hi. 35 Amaute na piaksa lei hoihna gam zapi ah tengin a lian mahmah nangma hoihna nuamsa in amau kumpi gamah a om lai nangawnun, nangma na sem loin a gamtatsiate uh a tawpsan tuan kei uh hi.
36 “Ahi hangin en in, tu-in kote sila ka hi uh a, ka pate uh a gah le a sunga piang a hoih khempeuh a nek theih nadingun na piaksa gamah sila ka hi uh hi. 37 Kote mawhna hangin a piangkhia peuhmah ko hong uk dinga na koih kumpite in tang ta uh hi. Amaute in a ut bangun ka pumpi tung uh le ka ganhonte uh tungah hong uk uh hi. Ka lungdong mahmah uh hi. ^l

Mipite Kiciamna

38 “Hihte khempeuh ngaihsunsa-in kiciamna kho khat ka bawl uh a, lai tawh gelhkhia-in ka makaite uh, ka Levi-te uh le ka siampite un a tungah seal a tum uh hi,” a ci uh hi. ^m